Hákon Ingi sigrar á skólamóti Árskóla

Hákon Ingi Rafnsson í 7. bekk Árskóla á Sauðárkróki sigraði á skólamótinu sem fram fór í gær. Hákon sigraði alla andstæðinga sína og hlaut 5 vinninga. Sigurður Ingi Hjartarsson varð annar með 3 1/2 vinning og Magnús Hólm Freysson varð í þriðja sæti með 3 vinninga.

Þeir Hákon og Sigurður unnu sér þar með rétt til að tefla á næsta stigi á leið til Íslandsmóts grunnskóla í skák, sem fram fer í byrjun maí.

Skákæfingu aflýst

Skákæfing sem fram átti að fara þriðjudaginn 18. mars n.k. hefur verið aflýst.

Tap gegn Austfirðingum í 6 umferð en sigur gegn Skákfélagi Íslands b í 7. umferð

Í 6. umferð Íslandsmóts Skákfélaga kepptu Sauðkrækingar við lið Austfirðinga, en þessi lið hafa marga hildi háð á síðustu árum og hafa viðureignirnar alltaf verið skemmtilegar. Austfirðingar hafa góðu liði á að skipa en það sama háir þeim og okkur að þeir tefla einfaldlega allt of fáar alvöru skákir á ári hverju. Þessi viðureign var ekki ólík hinum fyrri að hart var barist en niðurstaðan 4-2 sigur Austfirðinga. Jón og Unnar gerðu jafntefli á tveimur efstu borðunum og Árni Þór sigraði á 4. borði en hinar skákirnar töpuðust. 

Í 7. umferð var keppt gegn sterku b liði Skákfélags Íslands. Jón sigraði örugglega á fyrsta borði. Á öðru borði varð Unnar að bíta í það súra epli að gera jafntefli þó hann væri með peð og biskup en andstæðingurinn kónginn einan eftir. Biskupinn var hins vegar af vitlausum lit og peðið á jaðri borðsins og því ekkert hægt að gera. Þorleifur gerði jafntefli á þriðja borði en þeir bræður Árni Þór og Davíð Örn sigruðu báðir. Birkir Már varð síðan féll síðan fyrir svokölluðum Vodafone gambít, en ef farsími manns hringir meðan á skák stendur ber að gefa skákina. Engu að síður góður 4-2 sigur.

Sigurinn gegn skákfélaginu með stóra nafnið dugði þó skammt og liðið féll í 4. deild. Bestum árangri í seinni hluta mótsins náði Árni Þór sem sigraði í öllum þrem skákunum. Jón fékk 1 1/2 af 3 á fyrsta borði, Unnar og Davíð hlutu 1 vinning af 2 mögulegum og Þorleifur 1 af 3 mögulegum. Aðrir hlutu ekki vinninga að þessu sinni.

Við blasir því skemmtileg barátta við að vinna aftur sætið í 3ju deild að ári.  

KRingar erfiðir

Í fimmtu umferð Íslandsmóts skákfélaga var att kappi við b lið KR. Sigur var nauðsynlegur ef takast ætti að halda sæti liðsins í 3ju deild og allt benti til þess að öruggur sigur myndi vinnast. Liðsstjóri var farinn að gæla við úrslitin 4-2 um tíma. En á örskotsstundu léku Jón á efsta borðinu og Birkir á því neðsta skákum sínum niður í tap og niðurstaðan 2 1/2 vinningur Sauðkrækinga á móti 3 1/2 vinningi KRinga. 

Jón tapaði á fysta borði. Unnar sigraði á öðru borði þar sem andstæðingurinn mætti ekki til leiks. Þorleifur gerði jafntefli á þriðja borði. Árni Þór sigraði á því fjórða í góðri skák. Þór tapaði á 5 borði og Birkir á því sjötta einnig.

Í næstu umferð mætir félagið liði Skáksambands Austfirðinga.  

Jakob Sævar sigurvegari

Jakob Sævar Sigurðsson frá Siglufirði og Birkir Már Magnússon gerðu jafntefli í uppgjöri efstu manna í lokaumferð Meistaramóts Skákfélags Sauðárkróks sem fram fór í gærkvöldi. Skákin var spennandi og lauk ekki fyrr en vel eftir miðnættið. Jón Arnljótsson sigraði Þór Hjaltalín, Unnar Ingvarsson sigraði Hörð Ingimarsson og Guðmundur Gunnarsson sigraði Einar Örn Hreinsson.

Jakob Sævar fékk því 4 vinninga af 5 mögulegum og varð einn í efsta sæti. Birkir Már og Jón Arnljótsson urðu jafnir í 2-3 sæti með 3 1/2 vinning. Birkir var hærri á stigum og því efstur heimamanna á mótinu. Þeir Guðmundur Gunnarsson og Unnar Ingvarsson urðu í 3-4 sæti með 3 vinninga, en 9 keppendur tóku þátt í mótinu.

Tilgangur mótsins var ekki síst að æfa menn fyrir Íslandsmót skákfélaga sem fer fram næstu helgi en þar keppir Skákfélag Sauðárkróks í þriðju deild.

Jakob enn ósigraður

Þeir Jakob Sævar Sigurðsson og Hörður Ingimarsson gerðu jafntefli í 4. umferð Meistaramóts Skákfélags Sauðárkróks sem fram fór í gærkvöldi í milkilli baráttuskák. Þór Hjaltalín sigraði Einar Örn Hreinsson, Birkir Már Magnússon sigraði Guðmund Gunnarsson og loks sigraði Jón Arnljótsson Sigurð Ægisson.

Að lokinni 4 umferð er Jakob efstur með 3 1/2 vinning. Birkir Már Magnússon er með 3 en Jón Arnljótsson og Hörður Ingimarsson með 2 1/2 vinning. Flestir hinna hafa 2 vinninga.

Í lokaumferðinni mætast Jakob Sævar og Birkir Már í hreinni úrslitaskák um sigur í mótinu. Jón Arnljótsson mætir Þór Hjaltalín, Unnar Ingvarsson mætir Herði Ingimarssyni og þeir Einar Örn Hreinsson og Guðmundur Gunnarsson leiða saman hesta sína.

Úrslit og stöðu má nálgast á chess-results.

Jakob Sævar einn efstur á Skákþingi Skákfélags Sauðárkróks

Siglfirðingurinn Jakob Sævar Sigurðsson er einn efstur á skáþinginu að lokinni þriðju umferð. Hann sigraði Guðmund Gunnarsson og er því með fullt hús. Í öðru til fjórða sæti koma Guðmundur, Hörður Ingimarsson sem sigraði Sigurð Ægisson í mikili sóknarskák og Birkir Már Magnússon, sem sigraði Einar Örn Hreinsson.

Úrslit og röðun næstu umferðar má sjá á chess-results.  

Þriðja umferð Skákþings Skákfélags Sauðárkróks á morgun

Í þriðju umferð mætast tveir efstu menna Jakob Sigurðsson og Guðmundur Gunnarsson, Sigurður Ægisson og Hörður Ingimarsson, Birkir Már Magnússon og Einar Örn Hreinsson og Þór Hjaltalín og Unnar Ingvarsson. Jón Arnljótsson situr hjá.

Athygli er vakin á breytingu á mótaáætlun þar sem þessi umferð kemur í stað almennrar skákæfingar.

Fylgjast má með gangi mótsins á síðunni chess results.

 

Jakob og Guðmundur efstir eftir tvær umferðir

Önnur umferð meistaramóts Skákfélags Sauðárkróks fór fram í gærkvöldi. Tveir keppenda nýttu sér rétt til að sitja yfir, þannig að einungis var teflt á þremur borðum. Siglfirðingurinn Jakob Sævar Sigurðsson hélt áfram sigurgöngu sinni og var Einar Örn Hreinsson örugglega. Guðmundur Gunnarsson sigraði Hörð Ingimarsson í skák sem skipti algjörlega um eigendur undir lokin. Loks gerðu Unnar Ingvarsson og Jón Arnljótsson jafntefli í langri og erfiðri skák.

Þeir Guðmundur og Jakob eru efstir með 2 vinninga. Sigurður Ægisson er þriðji með 1 1/2 vinning. 

 

Næsta umferð verður tefld næsta þriðjudagskvöld

Meistaramót Skákfélags Sauðárkróks hafið

Fyrsta umferð meistaramóts Skákfélags Sauðárkróks fór fram í gærkvöldi. Alls eru 9 skákmenn skráðir til leiks, þar af 2 fulltrúar Siglfirðinga, þeir Sigurður Ægisson og Jakob Sævar Sigurðsson, sem fer mikinn í skákmótum Norðanlands nú um stundir.

Það hefur lengi háð skákmönnum á landsbyggðinni hversu fáar kappskákir þeir tefla á ári. Algengasta talan er 7, þ.e. þær skákir sem tefldar eru á Íslandsmóti Skákfélaga. Meistaramót Skákfélags Sauðárkróks í kappskákum hefur ekki verið haldið um áratuga skeið. Eins og gefur að skilja þá er lítið að marka skákstig manna sem tefla svo lítið, og úrslitin úr fyrstu umferðinni bera með sér að mótið verði mjög jafnt. Hart var barist í fyrstu umferðinni og komið vel framyfir miðnætti þegar flestir stóðu upp frá tafli. 

Í fyrstu umferð sigraði Hörður Ingimarsson, Jón Arnljótsson. Guðmundur Gunnarsson sigraði Unnar Ingvarsson.  Jakob Sævar Sigurðsson sigraði Þór Hjaltalín og Sigurður Ægisson sigraði Birki Má Magnússon. Einar Örn Hreinsson sat hjá í fyrstu umferð.  

Önnur umferð verður tefld að viku liðinni

 Sjá á chess-results.