Jón Arnljótsson atskákmeistari 2015

Átta skákmenn skráðu sig til leiks í atskákmeistaramót Skákfélags Sauðárkróks 2015. Mótið varð því 7 umferðir og fór fyrri hlutinn fram þann 7. janúar (umf. 1-3), en síðari hlutinn fór fram í gær, þann 14. janúar (umf. 4-7). Sigurganga Jóns Arnljótssonar virtist óstöðvandi og var hann búinn að leggja alla sína andstæðinga fyrir lokaumferðina, en þá tefldi hann við Þór Hjaltalín. Eftir æsispennandi endatafl og tímahrak ákváðu þeir að skipta með sér jöfnum hlut og endaði Jón með 6½ vinning. Birkir Már Magnússon tefldi af miklu öryggi og tapaði aðeins fyrir Jóni og náði öðru sæti með 6 vinninga. Þór Hjaltalín varð svo þriðji með 5½ vinning. Það setti nokkurt strik í reikninginn að tveir skákmenn forfölluðust í síðari hlutanum. Næstu tveir miðvikudagar verða hefðbundnir æfingadagar þar sem tefldar verða 15.mín. skákir.  

Gleðilegt nýtt ár!

Skákfélag Sauðárkróks óskar félögum sínum, velunnurum og skákvinum nær og fjær gleðilegs nýs árs og þakkar góðar stundir á liðnum árum. Starfið í haust hefur verið hefðbundið og undantekningalítið farið eftir æfinga- og mótaáætluninni sem kynnt var í upphafi vetrar. Skákfélagið hefur notið velvilja Sauðárkrókskirkju og fengið inni í safnaðarheimilinu fyrir starfsemina á miðvikudagskvöldum. Óhætt er að segja að þar fari afskaplega vel um mannskapinn og andinn góður þótt oft sé tekist hressilega á, á vígvelli skákborðsins. Á morgun, þann 7. janúar, hefst atskákmót Sauðárkróks og eru tímamörk 25 mínútur á mann til að ljúka skákinni. Samkvæmt dagskránni er gert ráð fyrir þremur umferðum á kvöldi fyrir atskákirnar, næstu þrjá miðvikudaga, alls 9 umferðir. Það verður hins vegar að koma í ljós hvað umferðirnar verða í raun margar, en það fer einfaldlega eftir fjölda þáttakenda. Mætum tímanlega og skráum okkur til leiks!

Pálmi Sighvats hraðskákmeistari 2014

Hraðskákmeistaramót Skákfélags Sauðárkróks fór fram í gær, 26. nóv. 2014. Sjö skákmenn mættu til leiks, en "skotta" skipaði áttunda plássið. Tefld var tvöföld umferð og var umhugsunartími 5 mínútur á skák. Eftir harða baráttu stóð Pálmi Sighvats uppi sem sigurvegari með 11 vinninga af 14 mögulegum og er því nýkrýndur hraðskákmeistari 2014. Birkir Már Magnússon varð í öðru sæti með 10 vinninga en hann hafði titil að verja frá því í fyrra. Baldvin Kristjánsson varð þriðji með 9 vinninga.

Næsta miðvikudag, 3. desember, verður hefðbundin æfing með 15 mín. skákum. Tvær síðustu æfingarnar fyrir jól, (10. og 17. des.) verða svo teknar undir Jólamótið, en þar verður umhugsunartími 15 mínútur. 

Móta- og æfingaáætlun Skákfélags Sauðárkróks 2014-2015

2014

5. nóv. 15. mín skákir

12. nóv. 15. mín. skákir

19. nóv. 15. mín skákir

26. nóv. Meistaramót í hraðskák 2014 – 5. mín skákir

3. des. 15. mín, skákir

10. des. Jólamótið – 15. mín skákir

17. des. Jólamótið frh. – 15. mín skákir

 

2015

7. jan. Atskákmót Skákfélags Sauðárkróks 25 mín pr. mann (umf 1-3) Meistaramót í atskák

14. jan. Atskákmót Skákfélags Sauðárkróks 25 mín pr. mann (umf 4-6)

21. jan. Atskákmót Skákfélags Sauðárkróks 25 mín pr mann. (umf 7-9)

28. jan. 15. mín skákir

4. feb. Meistaramót Skákfélags Sauðárkróks 1. umf. 90 mín + 30 sek á mann.

11. feb. Meistaramót Skákfélags Sauðárkróks 2. umf. 90 mín + 30 sek á mann.

18. feb. Meistaramót Skákfélags Sauðárkróks 3. umf. 90 mín + 30 sek á mann.

25. feb. Meistaramót Skákfélags Sauðárkróks 4. umf. 90 mín + 30 sek á mann.

4. mars. Meistaramót Skákfélags Sauðárkróks 5. umf. 90 mín + 30 sek á mann.

11. mars.15. mín skákir

18. mars. 15. mín skákir

20. mars – 21. mars. Íslandsmót Skákfélaga.

 

Sýndur verður mikill vilji til að hliðra til um skáktíma ef menn komast ekki t.d. vegna veikinda, vinnu, ófærðar eða annarra hluta vegna. Ef menn eru jafnir á móti ráða SB stig úrslitum.

 

Skákfélag Sauðárkróks í öðru sæti eftir fyrri hlutann

Fjórða umferð Íslandsmóts skákfélaga var tefld í dag og öttu Sauðkrækingar kappi við b-sveit Vinaskákfélagsins. Fóru leikar þannig að sigur hafðist í fjórum skákum en tveimur lauk með jafntefli og lokaniðurstaða því 5-1 fyrir Sauðárkrók. Jón lagði sinn andstæðing á 1. borði og sömuleiðis Pálmi á 2. borði. Árni og Þór skildu jafnir við sína andstæðinga á 3. og 4. borði, en Davíð og Guðmundur höfðu svo sigur á 5. og 6. borði. Guðmundur hefur teflt af miklu öryggi í þessum fyrri hluta mótsins og lagt alla sína andstæðinga og fengið fjóra vinninga af fjórum. Það er betra skor en nokkur annar hefur fengið í keppninni. Fyrri hluta keppninnar er nú lokið en síðustu þrjár umferðirnar verða tefldar 20.-21. mars á næsta ári. Eins og komið hefur fram hér á fréttasíðunni þá féll sveitin niður í 4. deild síðasta vetur. Spurningin er því hvort við náum að klóra okkur upp í 3. deildina aftur en þrjár efstu sveitirnar munu færast upp um deild.

Í fjórða sæti eftir þrjár umferðir

Lið Skákfélags Sauðárkróks er sem stendur í 4. sæti af 16 liðum í fjórðu deild Íslandsmóts skákfélaga sem fer fram nú um helgina. Í fyrstu umferð vannst sigur á A unglingaliði Skákfélags Reykjavíkur 4 1/2 vinningar á móti 1 1/2. Jón, Pálmi, Þór og Guðmundur sigruðu, Unnar gerði jafntefli en Davíð varð að bíta í það súra epli að tapa. 

Í annari umferð mættum við liði nágrannana úr Skákfélagi Siglufjarðar og var það hörku viðureign sem hefði getað farið á hvern veginn. Að þessu sinni sigruðu Siglfirðingar 3 1/2 - 2 1/2. Unnar og Guðmundur sigruðu. Þór gerði jafntelfi en Jón, Árni og Pálmi töpuðu.

Í þriðju umferð vannst síðan öruggur 5-1 sigur á ungri og efnilegri sveit Fjölnis í Grafarvogi. Jón tapaði á 1. borði en aðrir sigruðu. Á morgun verður att kappi við B sveit Vinaklúbbsins og er það síðasta viðureignin í fyrri hluta Íslandsmótsins. í vor verður síðari hlutinn tefldur og kemur þá í ljós hvort liðinu tekst að endurheimta sæti sitt í þriðju deild, en þrjú lið vinna sér rétt til að fara upp um deild 

Íslandsmót skákfélaga hefst um helgina

Að venju sendir Skákfélag Sauðárkróks sveit til þátttöku á Íslandsmót skákfélaga. Liðið teflir í 4. deild og verða tefldar alls sjö umferðir, fjórar að hausti en þrjár að vori. Fyrri hluti keppninnar hefst núna um helgina í Rimaskóla í Reykjavík og verða þá tefldar fjórar umferðir. Þeir sem skipa sveitina núna um helgina eru:

 1. Jón Arnljótsson

 2. Pálmi Sighvatsson

 3. Unnar Ingvarsson

 4. Árni Þór Þorsteinsson

 5. Birgir Örn Steingrímsson

 6. Þór Hjaltalín

 7. Davíð Örn Þorsteinsson

 8. Guðmundur Gunnarsson 

Fréttir frá aðalfundi

Aðalfundur félagsins var haldinn í gær, 1. október 2014. Kosið var í nýja stjórn, en hana skipa þeir Þór Hjaltalín, Guðmundur Gunnarsson og Jón Arnljótsson. Unnar Ingvarsson, sem verið hefur formaður félagsins til margra ára gekk úr stjórn, en hann flutti suður núna í haust. Skákfélagið þakkar Unnari frábær störf fyrir félagið og góðar samverustundir á undanförnum árum. Þrátt fyrir flutning mun Unnar áfram skipa sér í sveit með Sauðkrækingum á Íslandsmóti skákfélaga sem hefst núna um helgina. Stjórnin er tekin til starfa og verður unnið að gerð móta- og æfingaáætlunar fyrir veturinn og verður hún auglýst fljótlega. 

 

Vetrarstarfið er hafið

Athugið að skákæfingarnar hafa verið fluttar yfir í safnaðarheimili Sauðárkrókskirkju, Aðalgötu 1 og verða framvegis á miðvikudögum og hefjast kl 20. Hvetjum alla skákáhugamenn til að mæta og taka þátt í starfi Skákfélagsins.

Aðalfundur verður haldinn miðvikudaginn 1. október og hefst hann kl 20, á undan skákæfingu. 

Stjórnin 

Úrslit á Unglingalandsmóti UMFÍ á Sauðárkróki

Keppni í skák á Unglingalandsmóti UMFÍ á Sauðárkróki lauk í gær. Alls voru 46 keppendur skráðir til leiks en nokkru færri mættu til keppni  í eldri flokki, þ.e. keppendur 15-18 ára. Þar voru aðeins 6 keppendur mættir og tefldu allir við alla. Tefldar voru 6 umferðir eftir svissnesku kerfi í yngri flokknum, þar sem 26 keppendur mættu til leiks en í báðum flokkum höfðu keppendur 10 mínútna umhugsunartíma.

Öruggur sigurvegari í eldri flokki var Akureyringurinn Símon Þórhallsson sem sigraði alla sína andstæðinga. Í öðru sæti var Emil Draupnir Baldursson USAH  með 4 vinninga og Sigurður Ingi Hjartarson UMSS þriðji með 3 vinninga. Aðrir keppendur voru Magnea Helga Guðmundsdóttir UMSE, Þórarinn Þórarinsson ÍH og Arnór Stefánsson ÍH.

Alls mættu 27 keppendur í yngri flokk og var keppnin afar spennandi. Að loknum 6 umferðum var niðurstaðan sú að fjórir keppendur voru eftir og jafnir með 5 vinninga. Varð því að grípa til stigaútreiknings til að skera úr um sigurvegara. Niðurstaðan varð sú að í fyrsta sæti varð Sverrir Hákonarson UMSK (21,5 stig). Í öðru sæti Aron Birkir Guðmundsson HSK (18,5 stig) og í þriðja sæti Heiðar Óli Guðmundsson HSK (17,5 stig). Brynjar Bjarkason varð í fjórða sæti (16,5 stig). Í 5-8. sæti urðu Hákon Ingi Rafnsson UMSS, Snædís Birna Árnadóttir  ÍBR, Emil Draupnir Baldursson USAH og Magnús Hólm Freysson UMSS en þau fengu öll 4 vinninga. Í 9.-13. sæti urðu Halldór Jökull Ólafsson UMF Hrafnaflóka, Eiríkur Þór Björnsson USAH, Benedikt Fadel Farak HSK, Eyþór Ingólfsson HSÞ og Anton Breki Viktorsson  með 3 ½ vinning. Í 14.-16.sæti urðu Kristján Davíð Björnsson HSÞ, Haraldur Árni Sigurðsson ÍH, Þorvarður Hjaltason ÍH með 3 vinninga. Aðrir keppendur voru Helga Dís Magnúsdóttir UMSE, Sunna Þórhallsdóttir Akureyri, Þórunn Harpa Garðarsdóttir Fjölni, Bergþór Bjarkason ÍH, Haraldur Elís Gíslason ÍH, Óðinn Smári Albertsson UMSS, Arnar Steinn Hafsteinsson, Hrannar Snær Magnússon UMSE, Kristinn Hugi Arnarson UMSK, Natalía Sól Jóhannsdóttir HSÞ og Jósavin Arason HSÞ.