Skákfélag Sauðárkróks

15.11.2016 | 22:08

Aðalfundur Skákfélags Sauðárkróks 2016

Aðalfundur Skákfélags Sauðárkróks fer fram á morgun, miðvikudaginn 16. nóvember kl. 20, í safnaðarheimili Sauðárkrókskirkju. Til fundarins hefur áður verið boðað með auglýstri dagskrá með meira en tveggja vikna fyrirvara. Fundurinn fer fram fyrir hefðbundna æfingu en atkvæðisrétt á fundinum hafa skráðir félagsmenn. Dagskrá aðalfundar er sem hér segir:

Kosning fundarstjóra og fundarritara
Skýrsla stjórnar lögð fram
Reikningar lagðir fram til samþykktar
Lagabreytingar
Ákvörðun félagsgjalds
Kosning stjórnar
Önnur mál

Þór Hjaltalín,

formaður Skákfélags Sauðárkróks.

Spil og leikir | Slóð | Facebook | Athugasemdir (0)

3.11.2016 | 09:15

Jón Arnljótsson er skákmeistari Skagafjarðar 2016

Lokaumferð Skákþings Skagafjarðar 2016 – Landsbankamótsins var háð í gær. Sigurganga Jóns Arnljótssonar virtist óstöðvandi, en fyrir lokaumferðina var hann búinn að leggja alla sína andstæðinga og í raun búinn að tryggja sér sigur á mótinu og hinn virðulega titil „Skákmeistari Skagafjarðar 2016“. Jón tefldi við Þór Hjaltalín í lokaumferðinni og eftir mikla bráttuskák ákváðu þeir að skipta með sér jöfnum hlut og endaði Jón með 5½ vinning úr 6 skákum. Knútur Finnbogason sótti mótið alla leið frá Siglufirði og tefldi af miklu öryggi. Eftir tap gegn Jóni í fyrstu umferð fóru hlutirnir að ganga og lagði hann alla sína andstæðinga eftir það. Hlaut hann 5 vinninga og annað sætið á mótinu. Þór Hjaltalín tók svo þriðja sætið með 3½ vinning. Mótsstjórn vill þakka keppendum fyrir skemmtilegt mót og drengilega keppni. Einnig viljum við færa Gunnari Björnssyni, forseta vorum bestu þakkir fyrir hjálp og stuðning og sömuleiðis Landsbanka Íslands fyrir góðan stuðning við mótið og skáklíf í Skagafirði. Nánar um úrslit á mótinu má sjá á vefslóðinni: http://chess-results.com/tnr242637.aspx?lan=1&wi=821&turdet=YES

Spil og leikir | Slóð | Facebook | Athugasemdir (0)

27.10.2016 | 15:12

Jón Arnljótsson tekur forystuna

Fimmta umferð Skákþings Skagafjarðar 2016 – Landsbankamótsins fór fram í gær. Fram að þessu hefur Jón lagt alla sína andstæðinga og er með 4 vinninga (og eina hjásetu) eftir fimm umferðir og trónir einn í efsta sæti. Knútur Finnbogason hefur verið á mikilli siglingu eftir tap í fyrstu umferð gegn Jóni. Lagði lann Pálma Sighvats í gær og Þór Hjaltalín þar áður. Hann er nú í öðru sæti með þrjá vinninga. Í þriðja sæti, einnig með þrjá vinninga, er Þór Hjaltalín. Tvær umferðir eru nú eftir og má sjá paranir og úrslit á vefslóðinni: http://chess-results.com/tnr242637.aspx?lan=1&wi=821&turdet=YES

Spil og leikir | Slóð | Facebook | Athugasemdir (0)

13.10.2016 | 11:58

Skákþing Skagafjarðar – Landsbankamótið

Fyrsta umferð Skákþings Skagafjarðar var tefld í gær, 12. október. Fyrir umferðina var ljóst að keppendur yrðu 7 talsins og hafði þá fækkað um einn. Voru menn sammála um að það væri heldur fámennt fyrir 5 umferða mót með svissnesku kerfi. Það var því ákveðið á staðnum að breyta mótinu í 7 umferða „round robin“ mót, þar sem allir tefla við alla. Það þýðir að hver keppandi teflir 6 skákir og situr hjá eina umferð. Í fyrstu umferð hafði Þór Hjaltalín hvítt gegn Herði Ingimarssyni. Upp kom nokkuð flókin staða og tókst Þór að hafa betur að lokum. Knútur Finnbogason var mættur til leiks alla leið frá Siglufirði og stýrði hvítu mönnunum gegn Jóni Arnljótssyni, en varð að játa sig sigraðan eftir 34 leiki. Lengsta skák kvöldsins var milli Péturs Bjarnasonar, sem hafði hvítt, gegn Einari Erni Hreinssyni, en Einar varð mát í 74. leik. Pálmi Sighvatsson sat hjá í fyrstu umferð. Úrslit, paranir og dagskrá mótsins má sjá á vefslóðinni: http://chess-results.com/tnr242637.aspx?lan=1&wi=821&turdet=YES

Spil og leikir | Slóð | Facebook | Athugasemdir (0)

11.10.2016 | 12:01

Skákþing Skagafjarðar 2016 – Landsbankamótið, hefst á morgun

Fyrsta umferð Skákþings Skagafjarðar 2016 – Landsbankamótsins hefst á morgun, miðvikudag 12. október kl. 20 og fer fram í safnaðarheimili Sauðárkrókskirkju. Þegar þetta er skrifað hafa 8 skákmenn skráð sig til keppni og er enn tækifæri til að vera með, en skráningu lýkur 15 mínútum áður en taflmennskan hefst. Til mikils er að vinna, en sigurvegarinn hlýtur sæmdarheitið Skákmeistari Skagafjarðar 2016. Þegar skráða keppendur má sjá á vefslóðinni: http://chess-results.com/tnr242637.aspx?lan=1&wi=821&turdet=YES

Spil og leikir | Slóð | Facebook | Athugasemdir (0)

10.10.2016 | 19:53

Skákþing Skagafjarðar 2016 - Landsbankamótið

Skákþing Skagafjarðar – Landsbankamótið, hefst miðvikudaginn 12. október klukkan 20. Teflt verður í Safnaðarheimili Sauðárkrókskirkju, Aðalgötu 1 á Sauðárkróki. Tefldar verða 5 umferðir samkvæmt svissnesku kerfi* og er dagkráin eftirfarandi:

umf. miðvikudagur 12. október kl. 20
umf. laugardagur 15. október kl 14:30
umf. miðvikudag 19. október kl 20
umf. laugardag 22. október kl. 10
umf. miðvikudag 26. október kl. 20

Öllum er heimil þáttaka í mótinu og hlýtur sigurvegarinn sæmdarheitið „Skákmeistari Skagafjarðar 2016“.**

Heimilt verður að sitja hjá eina umferð (að undanskilinni síðustu umferð) og taka ½ vinning fyrir það. Ósk um yfirsetu þarf að berast mótsstjórn í síðasta lagi við upphaf umferðarinnar á undan.

Umhugsunartími verður 90 mín á skákina auk þess sem 30 sek bætast við tímann fyrir hvern leik (90 mín + 30 sek á leik). Mótið verður reiknað til íslenskra og alþjóðlegra skákstiga. Skráning er á netfangið thor@minjastofnun.is og á skákstað eigi síðar en 15 mín fyrir upphaf fyrstu umferðar.

* Mótsstjórn áskilur sér rétt til þess að gera breytingar á auglýstu fyrirkomulagi þegar fjöldi þátttakenda liggur fyrir. Endanlegt fyrirkomulag verður tilkynnt keppendum fyrir upphaf fyrstu umferðar.

** Skákmeistari Skagafjarðar getur aðeins sá orðið sem er búsettur í Skagafirði og/eða er fullgildur félagi í Skákfélagi Sauðárkróks eða Skákfélagi Siglufjarðar.

Spil og leikir | Slóð | Facebook | Athugasemdir (0)

2.10.2016 | 21:11

Góður árangur í fyrri hluta Íslandsmóts skákfélaga

Skákfélag Sauðárkróks er í öðru sæti í fjórðu deild Íslandsmóts skákfélaga, en fyrstu fjórar umferðir mótsins voru telfdar um helgina. Hvert lið var skipað sex leikmönnum í senn og liðsmenn Skákfélags Sauðárkróks fengu 20 vinninga af 24 mögulegum. Átta menn skiptu með sér skákunum að þessu sinni:

1. Borð. Jón Arnljótsson 3 af 4 vinningum

2. Borð. Birgir Steingrímsson 3 af 4 vinningum

3. Borð Pálmi Sighvats 3 1/2 af 4 vinningum

4. Borð. Unnar Ingvarsson 4 af 4 vinningum

5. Borð. Árni Þór Þorsteinsson 2 1/2 af 3 vinningum

5-6. Borð. Hörður Ingimarsson 2 af 2 vinningum

6. Borð. Baldvin Kristjánsson 1 af 2 vinningum

6. Borð. Magnús Björnsson 1 af 1 vinningi.

Í fyrstu umferð öttu okkar menn kappi við B sveit unglinga í Taflfélagi Reykjavíkur og vannst sú viðureign 6-0. Í annari umferð D sveit Fjölnis og vannst sú viðureign einnig 6-0. Þá var röðin komin að Vestmannaeyingum og eftir mikinn barning og undarlegan viðsnúning í ýmsum skákum lyktaði viðureigninni með jafntefli 3-3. Í lokaumferðinni var tefld við A sveit unglinga í Taflfélagi Reykjavíkur og vannst sú viðureign 5-1.

Alls komast þrjú lið upp um deild en það verður ekki ljóst hvort lið Skákfélags Sauðárkróks verður eitt þeirra fyrr en í marsmánuði, því þá er síðari hluti Íslandsmótsins tefldur.

Spil og leikir | Slóð | Facebook | Athugasemdir (0)

11.9.2016 | 19:59

Vetrarstarfið 2016-2017 er hafið

Vetrarstarf Skákfélags Sauðárkróks hófst miðvikudaginn 31. ágúst síðastliðinn, en æfingar verða, líkt og síðasta vetur, í safnaðarheimili Sauðárkrókskirkju á miðvikudögum kl. 20 og eru allir velkomnir, konur og karlar, ungir og gamlir og byrjendur jafnt sem lengra komnir. Framundan er fyrri hluti íslandsmóts skákfélaga sem mun fara fram í Rimaskóla í Reykjavík helgina 30. september – 2. október og verða tefldar fjórar umferðir í þessari lotu. Að venju munu Sauðkrækingar senda sveit til keppninnar, en liðið er núna í 4. deild. Sagðar verða fréttir af gengi liðsins hér á síðunni. Búið er að setja saman æfinga- og mótaáætlun fyrir veturinn og er hún eftirfarandi.

Æfinga- og mótaáætlun veturinn 2016-2017

2016

31. ágúst. Æfing

7. sept. Æfing

14. sept. Æfing

21. sept. Æfing

28. sept. Æfing

30. sept. – 2. okt. Íslandsmót skákfélaga, Rimaskóla í Rv.

5. okt. Æfing

12. okt. Skákþing Skagafjarðar 1. umf. 90 mín + 30 sek á mann.

15. okt. (lau) Skákþing Skagafjarðar 2. umf. 90 mín + 30 sek á mann.

19. okt. Skákþing Skagafjarðar 3. umf. 90 mín + 30 sek á mann.

22. okt. (lau) Skákþing Skagafjarðar 4. umf. 90 mín + 30 sek á mann.

26. okt. Skákþing Skagafjarðar 5. umf. 90 mín + 30 sek á mann

29. okt. (lau) Skákþing Skagafjarðar 6. umf. 90 mín + 30 sek á mann.

2. nóv. Skákþing Skagafjarðar 7. umf. 90 mín + 30 sek á mann.

9. nóv. Æfing

16. nóv. Æfing: Aðalfundur Skákfélags Sauðárkróks.

23. nóv. Æfing: Hraðskák

30. nóv. Meistaramót í hraðskák 2016 (5+2sek á leik)

7. des. Æfing

14. des. Jólamót Skf. Sauðárkróks. – 15. mín skákir

21. des. Jólamót Skf. Sauðárkróks (frh) – 15. mín skákir

Jólafrí

2017

4. jan. Æfing

11. jan. Atskákmót Skákfélags Sauðárkróks 25 mín pr. mann (umf 1-3) Meistaramót í atskák

18. jan. Atskákmót Skákfélags Sauðárkróks 25 mín pr. mann (umf 4-6)

25. jan. Atskákmót Skákfélags Sauðárkróks 25 mín pr mann. (umf 7-9)

26. jan. Skákdagurinn

1. feb. Æfing

8. feb. Æfing: 90 mín + 30 sek á mann.

15. feb. Æfing

22. feb. Æfing: 90 mín + 30 sek á mann.

1. mars Æfing

3. mars – 4. mars Íslandsmót Skákfélaga, síðari hluti

8. mars. Æfing

15. mars. Æfing: 90 mín + 30 sek á mann.

22. mars. Æfing

29. mars. Æfing. Hraðskák

5. apríl. Vorhraðskákmót Skf. Sauðárkróks (5+2sek)

12. apríl. Æfing: 90 mín + 30 sek á mann.

19. apríl. Æfing

26. apríl. Æfing

29. apríl. (lau) Skák á Sæluviku.

3. maí. Æfing

10. maí. Æfing

Sumarfrí

Spil og leikir | Breytt 21.10.2016 kl. 15:09 | Slóð | Facebook | Athugasemdir (0)

1.5.2016 | 17:41

Vetrarstarfinu að ljúka

Vetrarstarfinu 2015 – 2016 lauk núna um helgina með „skák í sæluviku“, en þá buðu félagar í Skákfélagi Sauðárkróks gestum Skagfirðingabúðar að tefla við sig. Var stillt upp á þremur borðum og voru ýmsir gestir verslunarinnar, ungir sem gamlir, sem þáðu boðið og tefldu við skákfélagsmenn. Er óhætt að segja að uppátækið hafi mælst vel fyrir.

Að öðru leyti hefur dagskrá vetrarins verið hefðbundin og gengið að mestu eftir eins og hún var kynnt í haust. Æfingar voru einu sinni í viku, á miðvikudögum kl 20, í safnaðarheimili Sauðárkrókskirkju og viljum við nota tækifærið hér og þakka Kirkjunni fyrir þennan góða stuðning við skáklíf í Skagafirði. Að venju sendi Skákfélag Sauðárkróks sveit til keppni á Íslandsmót skákfélaga og teflum við þar í 4. deild. Vonir stóðu til að við næðum að klóra okkur upp í næstu deild en það gekk ekki eftir og lentum við í fjórða sæti, en aðeins þrjú lið færast upp. Mætum við galvaskir næsta haust og verður þá ekkert gefið eftir. Til stóð að halda Skákþing Skagafjarðar núna í vor, en eftir nokkra umræðu varð niðurstaðan sú að halda mótið framvegis á haustin. Er stefnt að því að halda mótið í september og verður þá ágætur undirbúningur og upphitun fyrir Íslandsmót skákfélaga. Einnig er rétt að vekja athygli hér á Skákþingi Norðlendinga, en samkvæmt mótaská Skáksambands Íslands verður það haldið að þessu sinni á Siglufirði dagana 26.-28. ágúst 2016.

Skákfélagsmenn er þá hérmeð komnir í sumarfrí og óskum við skákmönnum og velunnurum gleðilegs sumars.

Spil og leikir | Slóð | Facebook | Athugasemdir (0)

11.11.2015 | 17:44