Nánari upplýsingar

Skákæfingar í Húsi frítímans á mánudögum kl. 17 - 18.30 eru ætlaðar fyrir fólk á grunnskólaaldri. Æfingarnarnar hafa verið fámennar til þessa, en farið hefur verið yfir aðferðir við að máta og koma peðum upp í borð, byrjunartaflmennsku o.fl.  Svo er auðvitað telft.  Engin æfingagjöld eða mætingarskylda og opið öllum án tillits til búsetu.  Svokallað Kjördæmismót í skólaskák verður haldið í apríl og þar er keppt í tveimur aldursflokkum 1.-7. bekk og 8.-10. bekk og sigurvegararnir fá keppnisrétt á Landsmóti í skólaskák, sem haldið verður á Akureyri 5.-7. maí. Þátttökurétt í Kjördæmismóti eiga nemendur í grunnskólum í Skagafjarðar og Húnavatnssýslum og hér er kjörið tækifæri til að æfa sig fyrir það mót.  Líka er bent á vefinn skakkennsla.is, en þar er ýmsan fróðleik að finna um taflmennsku.  Svo er upplagt að koma í Hús frítímans og prófa þekkinguna, æfingin skapar meistarann.  Umsjónarmaðu æfinganna er Jón Arnljótsson, [e-mail] 865 3827

Guðmundur atskákmeistari

                                                                                          

Atskákmót Skákfélags Sauðárkróks var haldið í gærkvöldi, 4 tóku þátt og bar Guðmundur Gunnarsson sigur úr býtum með 2 vinninga og 3 stig, en Pálmi Sighvatsson var með jafnmarga vinninga og 2 stig og hlaut því annað sætið.  Þriðji var Hörður Ingimarsson með 1 vinning og 2 stig, en Jón Arnljótsson hlaut 1 vinning og 1 stig.  Umhugsunartíminn var 25 mínútur á skákina.

Fyrstu helgina í mars mun félagið senda sveit til keppni í seinni hluta Íslandsmóts Skákfélaga, en þar er Skákfélag Sauðárkrók í öðru sæti í fjórðu deild og á þokkalega möguleika á að komast upp í þá þriðju, en 3 efstu liðin ná þeim áfanga.

Helgina 24.-26. mars verður svo Skákþing Norðlendinga haldið á Króknum, í umsjá skákfélagsins.

Nú hafa 2 barna og unglingaæfingar verið haldnar, í Húsi frítímans, en þátttaka verið dræm.  Þessum æfingum verður fram haldið og vonast eftir meiri þátttöku, en þær eru opnar og engin æfingagjöld eða mætingarskylda.

Æfingarnar eru kl. 17 til 18.30 á mánudögum og er Jón Arnljótsson umsjónarmaður þeirra.

Atskákmóti frestað

Atskákmóti félagsins, sem átti að hefjast í gærkvöldi, var frestað vegna lítillar mætingar og er nú fyrirhugað að það hefjist næsta miðvikudagskvöld, 18. janúar.

Skákæfingum, fyrir börn og unglinga, verður framhaldið mánudaginn 16. janúar kl.17.00, í Húsi frítímans, en á fyrstu æfingunni, á mánudaginn, var fámennt.

Nýr skákbúnaður

 

Nýlega keypti Skákfélagið 10 töfl og klukkur, auk 1 upphengjanlegs sýningarborðs.  Einstaklingur gaf svo félaginu 11. settið.  Ástæða kaupanna var væntanlegt barna- og unglingastarf, en félagið átti mjög lítið af nothæfum búnaði fyrir.  Meginhluti styrks sem Sveitarfélagið Skagafjörður veitti Skákfélaginu til að starta barna- og unglingastarfi var nýttur til kaupanna.  Á 15 mínútna móti, sem haldið var miðvikudagskvöldið 14. des. var svo búnaðurinn vígður.  Töflin vöktu almenna lukku, en ein klukkan gerði skráveifu í einni skákinni, líklega vegna tæknilegra mistaka.  6 keppendur tóku þátt í mótinu og bar Jón Arnljótsson sigur úr býtum með 5 vinninga, en Pálmi Sighvatsson kom næstur með 4.  Aðrir þátttakendur blönduðu sér ekki í baráttuna um sigurinn að þessu sinni.  Nú er Skákfélagið komið í jólafrí, en næsta æfing er 4. janúar 2017 og svo hefst atskákmót félagsins, með 25 mínútna umhugsunartíma, þann 11.  Gert er ráð fyrir að tefla 3 umferðir á kvöldi og ljúka mótinu á 3 miðvikudagskvöldum, en endanlegur umferðafjöldi ræðst af fjölda keppenda, en þátttaka er öllum heimil.  Telft er í Safnaðarheimilinu.

Barna- og unglingaæfingarnar eiga svo að hefjast 9. janúar í Húsi Frítímans og verða öllum opnar sem kunna mannganginn svona nokkurnveginn, en þar er meiningin að nýta sýningarborðið til tilsagnar og töflin og klukkurnar til iðkunar, en eins og sjá má á myndinni fylgja 2 auka drottningar hverju setti, sem er til mikilla þæginda þegar peðin flykkjast upp í borð.

Skákæfingar fyrir börn og unglinga

Félagið hyggst, eftir áramót, byrja með skákæfingar fyrir börn og unglinga.  Æfingarnar verða á mánudögum frá kl. 17.00 til 18.30 í Húsi Frítímans.  Fyrsta æfingin verður 9. janúar.  Gert er ráð fyrir að þátttakendur kunni mannganginn, en reynt verður að kenna þeim ýmis mikilvæg atriði, með það að markmiði að auka færni þeirra í skák. Gert er ráð fyrir að fyrirkomulag æfinganna muni þróast eftir aðstæðum, en hægt er að skrá sig nú þegar, í póstfanginu [e-mail] , en engin þátttökugjöld verða í vetur.  Skráning er til að auðvelda utanumhald og verður opin fram eftir vetri.

Norðurlandsmót

Skákþing Norðlendinga verður haldið á Sauðárkróki 24. - 26. mars 2017.  Mótið verður með hefðbundnu sniði, 4 atskákir á föstudagskvöld, 2 kappskákir á laugardeginum og 1 á sunnudag og síðan hraðskákmót.  Nánar verður sagt frá tilhögun síðar. 

Jólamót

Næsta mót er 14. des, en þá er umhugsunartíminn 15 mín. Mótinu verður fram haldið 21. des, ef ekki tekst að klára það 14.  Næsta miðvikudag er æfing.

Úrslit í hraðskákmóti

Pálmi Sighvatsson er Hraðskákmeistari Skákfélags Sauðárkróks.  Hann hlaut 5 vinninga af 6 mögulegum, 4 tóku þátt í mótinu og telfdu tvöfalda umferð.  Annar varð Jón Arnljótsson með 4 vinninga, Guðmundur Gunnarsson hlaut 2 og Hörður Ingimarsson 1.

Hraðskákmót

Næsta miðvikudagskvöld, 30.11., verður hraðskákmót félagsins haldið, í Safnaðarheimili Sauðárkrókskirkju og hefst að lokinni skráningu kl. 20.00

Breyting á stjórn

Á aðalfundi 16. nóv. síðastliðinn gaf Þór Hjaltalín ekki kost á sér til endurkjörs, en hann hefur verið formaður félagsins undanfarin 2 ár.  Pálmi Sighvatsson var kosinn í stjórn, í stað Þórs, en Guðmundur Gunnarsson og Jón Arnljótsson voru endurkjörnir og hefur sá síðarnefndi tekið að sér formannsstarfið.