Atskákmót Sauðárkróks hefst á laugardaginn

Í tilefni af íslenska skákdeginum verður Atskákmót Sauðárkróks haldið laugardaginn 26. janúar. Teflt verður í Safnahúsinu á Sauðárkróki og hefst mótið klukkan 13:00. Umhugsunartími er 25 mínútur pr mann á skák. Teflt verður til klukkan 18:00 á laugardaginn og fer eftir þátttöku hvort mótinu verður lokið síðar. Skráning á staðnum.

Stjórnin

Sunnudagssigur

Sigur vannst í síðustu umferð fyrri hluta Íslandsmóts skákfélaga. Liðsmenn Skákfélags Sauðárkróks fengu 5 vinninga gegn 1 vinningi D sveitar Goðans-Máta.
Félagið er því í neðri hluta deildarinnar og þarf að taka sig á til að halda sæti sínu í 3ju deild. Davíð Örn Þorsteinsson stóð sig best þeirra sem kepptu nú um helgina, fékk 3 vinninga af 4 mögulegum. Unnar Ingvarsson, Birgir Örn Steingrímsson og Þór Hjaltalín fengu tvo vinninga af fjórum mögulegum, en aðrir minna.
Hægt er að sjá heildarstöðuna í mótinu á síðunni
http://chess-results.com/tnr82364.aspx?art=0&lan=1&flag=30

Tvö töp á laugardegi

Ekki gekk vel á öðrum degi Íslandsmóts Skákfélaga, en í dag voru tefldar tvær umferðir. Í þeirri fyrri náðist aðeins einn vinningur gegn sterku A liði Vinjar, en Davíð Örn Þorsteinsson sigraði á 6 borði. Í þriðju umferð mættum við C liði Goðans-Mátar. Þar voru okkur verulega mislagðar hendur og umferðin tapaðist 1 1/2 - 3 1/2. Davíð Örn sigraði sinn andstæðing, nú á fimmta borði og Þór Hjaltalín gerði jafntefli. Fyrirfram var búist við jafnri viðureign, enda liðin áþekk að styrkleika, en þetta var einfaldlega ekki okkar dagur. Betri stöður snerust eins og strá í vindi og því fór sem fór. Það er því mjög mikilvægt að ná hagstæðum úrslitum á morgun, en þá mætir lið félagins D sveit Goðans-Mátar.

Naumt tap fyrir KR í fyrstu umferð Íslandsmóts skákfélaga

Fyrstu umferð Íslandsmóts skákfélaga, sem fer fram í Reykjavík nú um helgina, er lokið og ljóst að hún tapaðist með 2 1/2 vinningi gegn 3 1/2. Sveit KR er mjög sterk og státar m.a. að dönskum fidemeistara á fyrsta borði og fyrrum Íslandsmeistara Gunnari Kr. Gunnarssyni á öðru. Fyrirfram var því búist við erfiðum degi hjá okkar mönnum. Okkar menn stóðu sig hins vegar vel og voru í raun óheppnir að ná ekki að landa jafntefli í viðureigninni.
Þeir Unnar Ingvarsson og Birgir Örn Steingrímsson sigruðu í sínum skákum á öðru og þriðja borði. Þór Hjaltalín gerði jafntefli á fimmta borði, en Jón Arnljótsson, sem telfdi á fyrsta borði, Hörður Ingimarsson á fjórða borði og Davíð Örn Þorsteinsson á sjötta borði töpuðu. Í fyrramálið mætir sveitin liði A liði Vinjar, en þeir hafa á að skipa sterku liði.

Skákæfingar hafnar að nýju

Skákæfingar Skákfélags Sauðárkróks eru hafnar. Teflt verður í Safnahúsinu á Sauðárkróki á þriðjudagskvöldum í vetur og hefjast æfingarnar kl. 20:00.

Undirbúningur félagsins fyrir Íslandsmót skákfélaga er hafinn, en félagið sendir lið í 3ju deild. Áhugasömum er bent á að mæta á æfingar á þriðjudögum. Einn nýr félagi hefur gengið til liðs við félagið og er það Birgir Örn Steingrímsson, sem hefur 1650 elostig.

Jón tapaði í síðustu umferð

Jón tapaði í síðustu umferð Reykjavíkurskákmótsins fyrir Christinu Andersson og endaði með 4 vinninga af 9 mögulegum. Árangur Jóns samsvaraði 2000 ELO stigum.

Jón í góðum málum á Reykjavík open

Í næstsíðustu umferð Reykavíkurskákmótsins sigraði Jón Arnljótsson norska skákmanninn Halvor Haga (ELO 2032). Jón er þar með kominn með 4 vinninga af 8 mögulegum. Í síðustu umferð teflir Jón við sænsku skákkonuna Christin Andersson  (ELO 2102), en hún er alþjóðlegur skákmeistari kvenna. Árangur Jóns á mótinu samsvarar 2036 elostigum.

Reykjavík open

Jón Arnljótsson stendur í ströngu í Reykjavik open. Eftir sigur gegn Vigni Vatnari Stefánssyni, tapaði hann í gær fyrir Jóhanni Ragnarsyni (ELO 2082). Í dag voru tefldar tvær umferðir. Í þeirri fyrri gerði Jón jafntefli við Vijay Bharat frá Indlandi (ELO 1941) en sigraði í þeirri seinni Hans Richard Thjomoe (ELO 1926)frá Noregi. Jón er því með 3 vinninga af 7 mögulegum. Á morgun, í næstsíðustu umferð, teflir Jón við norska skákmanninn Halvor Haga (ELO 2032)

Tap í annari og þriðju umferð

Eftir frábæran árangur í fyrstu umferð Reykjavíkurmótsins tapaði Jón Arnljótsson fyrir bandarískum stórmeistara í annari umferð og fyrir skákmanni frá Singapore í þriðju umferð. Í fjórðu umferð, sem fer fram á morgun teflir Jón við sterkasta skákmann landsins í barnaflokki, Vigni Vatnar Stefánsson, en hann hefur vakið mikla athygli fyrir mikla skákhæfileika, þrátt fyrir ungan aldur.

Jón Arnljótsson teflir á Opna Reykjavíkurmótinu

Reykjavíkurmótið í skák er stærsti skákviðburður hvers árs á Íslandi. Nú tefla um 200 keppendur á mótinu þar á meðal fjölmargir erlendir skákmeistarar. Langt er síðan félagi í Skákfélagi Sauðárkróks keppti í þessu móti og var því sérstaklega ánægjulegt að Jón skyldi ákveða að taka sér frí frá búskapnum og tefla í mótinu.

Þegar þetta er skrifað er fyrstu umferð lokið og má með henni segja að Jón hafi sannað að hann eigi fullt erindi í keppni sem þessa, en í fyrstu umferð gerði hann jafntefli við Lenku Ptacnikovu alþjóðlegan stórmeistara kvenna. Hún státar af 2289 alþjóðlegum ELO stigum. Vonandi heldur Jón áfram á sömu braut en á morgun fær Jón enn erfiðari andstæðing, eða bandaríska stórmeistarann Maurice Ashley sem er með heil 2452 ELO stig.