Aðalfundur Skákfélags Sauðárkróks

Aðalfundur Skákfélags Sauðárkróks verður haldinn þriðjudaginn 5. nóvember í Safnahúsinu á Sauðárkróki á undan skákæfingu.

Stjórnin

Það er vont og venst ekki

Viðureign okkar manna við sveit GM Hellis í 4 umferð Íslandsmóts skákfélaga var í meira lagi slök frá okkar hálfu. Unnar fór á undan með vondu fordæmi og lék niður hartnær unninni stöðu eftir að hafa ekki séð tiltölulega einfalt framhald til að sigra og í kjölfarið töpuðust viðureignirnar á þremur neðstu borðunum. Jón klóraði í bakkann á fyrsta borði og Þór gerði jafntefli eftir að hafa einnig haft unna stöðu fyrir framan sig. Semsagt afleit úrslit og ljóst að róðurinn verður erfiður í vor að halda sæti okkar í þriðju deild.

Jafnt í annari umferð en tap í þriðju

Í annari umferð Íslandsmóts skákfélaga gerði sveit Skákfélags Sauðárkróks jafntefli við c sveit Víkingaklúbbsins. Fékk hvor sveit 3 vinninga. Sigrar unnust fljótlega á neðstu borðunum þar sem þeir Davíð Örn Þorsteinsson og Guðmundur Gunnarsson sigruðu örugglega. Þór Hjaltalín og Þorleifur Ingvarsson gerðu jafntefli á 3. og 4. borði en Unnar tapaði örugglega á öðru borði en Jón var óheppinn að ná ekki jafntefli á því fyrsta. Niðurstaðan hefði því getað verið betri, en 1 stig er betra en ekkert. 

Í þriðju umferð mættum við A sveit Skákfélags Selfoss og nágrennis. Um hörku viðureign var að ræða. Jón gerði fljótlega jafntefli á fyrsta borði, en hinar skákirnar voru spennandi og skemmtilegar. Úrslitin voru hins vegar ekki til að hrópa húrra fyrir, þar sem þær töpuðust allar! Við áttum vissulega meira skilið úr þessari viðureign þó sigur Selfyssinga hafi verið sanngjarn.

Í fjórðu umferð í fyrramálið mætum við e liði GM-Hellis og er stefnan að sjálfsögðu sett á sigur, enda mjög mikilvægt ef möguleiki er á að liðið haldi sér í deildinni. 

Tap í fyrstu umferð Íslandsmót skákfélaga

D sveit GM Hellis sigraði okkar menn með 4 1/2 vinningi gegn 1 1/2 í fyrstu umferð Íslandsmóts skákfélaga sem fram fer í Rimaskóla. Um 300 skákmenn sitja að tafli í hverri umferð, en teflt er í fjórum deildum og er Skákfélag Sauðárkróks í þeirri þriðju ásamt 14 öðrum liðum. 

D sveit hins nýsameinaða liðs Hellis og Goðans var heldur sterkara á pappírunum en okkar menn, en sigur þeirra var þó óþarflega stór. Aðeins Þorleifur náði að sigra á 3ja borði og Þór Hjaltalín gerði jafntefli á því fjórða. Unnar var með gjörunna stöðu á öðru borði en tókst einhvern vegin að klúðra stórkostlega og þeir Jón á fyrsta borði, Davíð á fimmta borði og Guðmundur á sjötta borði töpuðu.  Jón hafnaði jafnteflisboðið snemma í skákinni og Guðmundur var með vænlega stöðu á 6. borði um tíma. 

Í fyrri umferð morgundagsins mætum við C liði Víkingaklúbbsins og verður liðið óbreytt frá fyrstu umferðini.  

Skákkennsla í Árskóla

Síðasta vetur var tekið upp á þeirri nýbreytni að skák var kennd í Árskóla á Sauðárkróki. Nemendur í áttunda bekk gátu valið skák sem valgrein og voru rúmlega 20 nemendur sem nýttu sér þann möguleika. Áfram verður haldið í vetur og hafa tæplega 20 nemendur í 8. bekk þegar skráð sig í skákkennslu. Unnar Ingvarsson mun hafa umsjón með kennslunni í vetur.

Skák var einnig kennd í yngri bekkjum Árskóla þar sem Kristján Halldórsson sá um kennslu. Mikill árangur hefur orðið af kennslunni og líklegt að skákfélagið muni bjóða upp á sérstakar helgaræfingar fyrir áhugasöm börn og unglinga í vetur.

Íslandsmót skákfélaga um helgina

Skákfélag Sauðárkróks sendir að venju lið til keppni í þriðju deild Íslandsmóts Skákfélaga, sem fer fram í Reykjavík næstu helgi. Eftirtaldir munu tefla fyrir félagið í ár:

Jón Arnljótsson

Unnar Ingvarsson

Þorleifur Ingvarsson

Þór Hjaltalín

Davíð Örn Þorsteinsson

Guðmundur Gunnarsson

Birkir Már Magnússon

Í fyrra slapp liðið naumlega við fall og ljóst að deildin er enn sterkari í ár, þannig að liðsmenn verða að gera sitt allra besta að þessu sinni til að forðast fall í fjórðu deild.

Skákæfingar hefjast á morgun

Þriðjudagskvöldið 10. september verður fyrsta skákæfing vetrarins haldin í Safnahúsinu á Sauðárkróki. Hefst æfingin klukkan 21 en ekki klukkan 20. eins og venja er, vegna landsleiks Íslands og Albaníu í fótbolta.

 

Halldór Broddi og Hákon Ingi á landsmóti í skólaskák

Þeir Halldór Broddi Þorsteinsson og Hákon Ingi Rafnsson héldu til Patreksfjarðar og tefldu þar á landsmótinu í Skólaskák, en þangað mæta skerkustu skákmenn landsins í grunnskólaflokki. Halldór og Hákon eru báðir nemendur í Árskóla á Sauðárkróki og kepptu fyrir hönd Norðurlands vestra á mótinu. Báðir stóðu þeir sig með prýði. Halldór hlaut 2 vinninga í eldri flokki en Hákon 3 1/2 vinning af 11 mögulegum. Halldór er á fyrsta ári í eldri flokki en Hákon á enn eftir ár i þeim yngri og eiga þeir báðir framtíðina fyrir sér. Hægt er að sjá heildarúrslit á fréttasíðunni www.skak.is 

Stefán sigraði Hannes Hlífar

Stefán Bergsson sigraði stórmeistarann Hannes Hlífar Stefánsson í

síðustu umferð Skákþings Norðlendinga og tryggði sér þannig titilinn Skákmeistari Norðlendinga 2013. Hannes hafði hins vegar þegar tryggt sér sigurinn í mótinu. Helstu úrslit urðu.

1. Hannes Hlífar Stefánsson 6 vinningar

2. Þorvarður Fannar Ólafsson 5 1/2 vinningur

3-4 Sverrir Örn Björnsson og Stefán Bergsson 5 vinningar 

5 Vigfús Ó. Vigfússon 4 1/2 vinningur. Vigfús fékk jafnframt verðlaun fyrir besta árangur undir 2000 stigum.

Þá fengu þeir Sigurður Ægisson, Jón Arnljótsson og Jakob Sævar Sigurðsson verðlaun fyrir besta árangur undir 1800 stigum.

Mótið tókst hið besta og var ánægja með framkvæmdina. Hægt er að sjá heildarúrslit á síðunni http://chess-results.com/tnr98153.aspx?art=1&rd=7&lan=1&wi=821 en einnig er hægt að skoða myndir frá mótinu hér á síðunni og á www.skak.is.

Hraðskákmót Norðurlands var haldið strax að loknum kappskákunum og gerði Stefán Bergsson sér lítið fyrir og sigraði alla 12 andstæðinga sína. Hann er því ósigaður í 14 skákum í röð. Hægt er að sjá úrslit hraðskákmótsins á þessari slóð: http://chess-results.com/tnr98868.aspx?art=1&lan=1&wi=821 

Við upphaf mótsins var Haraldur Hermannsson heiðraður fyrir áralangt starf að skagfirsku skáklífi  og fékk hann gjafir bæði frá Skáksambandi Íslands sem Skákfélagi Sauarkróks 

Gunnar Björnsson var skákstjóri mótsins og stóð sig að venju hið besta og er honum þakkað starfið. Gestum þökkum við skemmtilega helgi. 

Sveinbjörn náði ekki að leggja Hannes

Þrátt fyrir hetjulega baráttu tapaði Akureyringurinn síkáti, Sveinbjörn Sigurðsson fyrir Hannesi Hlífari Stefánssyni í næst síðustu umferð og hefur Hannes því tryggt sér sigur í mótinu fyrir síðustu umferð. Haukamennirnir Sverrir Örn og Þorvarður gerðu jafntefli en án mikillar baráttu. Helstu úrslit önnur voru að Stefán Bergsson sigraði Rúnar Sigurpálsson, Jón Kristinn Þorgeirsson sigraði Hjörleif Halldórsson og Áskell Örn sigraði Andra Frey Björgvinsson. Mikil spenna er hver mun hreppa titilinn Skákmeistari Norðurlands. Í síðustu umferð mætast m.a. Stefán Bergsson og Hannes Hlífar, Þorvarður Ólafsson og Áskell Örn Kárason, Jón Kristinn og Sverrir Örn og Vigfús Vigfússon mætir Sveinbirni Sigurðssyni.