Skákfélag Sauðárkróks

Þórleifur Karlsson varð Skákmeistari Norðlendinga 2021, eftir sigur í langri og flókinni skák í dag. Þórleifur er félagi í Skákfélagi Akureyrar, en búsettur á Sauðárkróki og það er orðið langt síðan skákmaður búsettur í Skagafirði vann þennan titil seinast. Tómas Björnsson og Þórleifur hlutu 5 1/2 vinning í mótinu, en Tómas varð hærri á stigum og er því sigurvegari mótsins. Andri Freyr Björgvinsson varð þriðji með 5 vinninga, Jón Arnljótsson, Unnar Ingvarsson og Gunnar Freyr Rúnarsson fengu 4 vinninga. Sjá úrslit hér. Tómas vann einnig hraðskákmótið, fékk 6 vinninga af 7 mögulegum, Þórleifur varð annar með 5 1/2 v. og jafnframt Hraðskákmeistari Norðlendinga 2021. Andri Freyr varð þriðji með 5 v., en aðrir fengu minna. Úrslit

Í kvöld var telfdur atskákhluti Skákþings Norðlendinga. Þátttaka er heldur dræm, en ákveðið var að halda sig við auglýsta dagskrá, þó rætt væri að breyta mótinu í 9 umferða atskákmót. Efstur eftir 4 umferðir er Tómas Björnsson (2186) með 3 1/2 vinnig, Þórleifur Karlsson (2002) hefur 3 og þeir Andri Freyr Björgvinsson (2088), Jón Arnljótsson (1855) og Gunnar Freyr Rúnarsson (1947) eru með 2 1/2 vinning. Unnar Ingvarsson (1774) hefur 2 vinninga og Birgir Jónsson (1441), Sindri Snær Pálsson (0), Arnar Smári Signýjarson (1506) og Jón Magnússon (1372) 1 vinnig hver. 4 keppenda eru búsettir í Skagafirði, 3 á Akureyri og 3 komu að sunnan, sem og dómari mótsins Ingibjörg Edda Birgisdóttir. Þórleifur er efstur í keppninni um titilinn skákmeistari Norðlendinga 2021 og Andri og Jón koma næstir, en þar sem pörun í svona fámennu móti getur orðið svolítið skrítin, er best að sleppa öllum spádómum um úrslit, en hér má sjá stöðuna í mótinu og fylgjast með framhaldinu.

Síðastliðið miðvikudagskvöld hófust skákæfingar að nýju, eftir nærri árshlé. Að vísu var reynt að byrja í haust, þegar covid-reglurnar voru mildastar, en það stóð ekki lengi og voru það aðeins 2 æfingar sem fleiri en 1 mætti á. 4 mættu á miðvikudaginn og von er á fleirum á næstu æfingu, en æfingarnar eru öllum opnar og hefjast kl. 8 (20.00) á kvöldin og standa oftast til 11 (stundum lengur) en þátttakendum er frjálst að koma og fara þegar þeim hentar, því skipulagið er ekki mjög strangt. Seinni hluti Íslandsmóts skákfélaga, sem hófst haustið 2019 og félagið tekur þátt í hefur ekki enn verið haldinn, en er nú á dagskrá í maí, með fyrirvara um sóttvarnastöðu.

Atskákmót Skákfélags Sauðárkróks var haldið í febrúar.  Aðeins 4 voru mættir í upphafi móts og var telfd einföld umferð, en af ófyrirsjánlegum ástæðum varð mótið ekki lengra, þó til hafi staðið að tefla tvöfalda umferð.  Pálmi Sighvatsson varð efstur með 3 vinninga, Jón Arnljótsson fékk 2, Arnar Þór Sigurðsson 1 og Tryggvi Þorbergsson rak svo lestina að þessu sinni.  Framundan var svo þátttaka í seinni hluta Íslandsmóts skákfélaga 20 og 21 mars, en því móti hefur verið frestað um a.m.k 2 mánuði vegna Kórónaveirunnar, að ráðleggingu landlæknisembættisins.  Eftir fyrri hlutann sem var telfdur í október er félagið í 12 sæti í 3 deild, sem er fallsæti og því þyrfti að ganga betur í seinni hlutanum, þegar hann kemst á.