Jón tapaði í síðustu umferð

Jón tapaði í síðustu umferð Reykjavíkurskákmótsins fyrir Christinu Andersson og endaði með 4 vinninga af 9 mögulegum. Árangur Jóns samsvaraði 2000 ELO stigum.

Jón í góðum málum á Reykjavík open

Í næstsíðustu umferð Reykavíkurskákmótsins sigraði Jón Arnljótsson norska skákmanninn Halvor Haga (ELO 2032). Jón er þar með kominn með 4 vinninga af 8 mögulegum. Í síðustu umferð teflir Jón við sænsku skákkonuna Christin Andersson  (ELO 2102), en hún er alþjóðlegur skákmeistari kvenna. Árangur Jóns á mótinu samsvarar 2036 elostigum.

Reykjavík open

Jón Arnljótsson stendur í ströngu í Reykjavik open. Eftir sigur gegn Vigni Vatnari Stefánssyni, tapaði hann í gær fyrir Jóhanni Ragnarsyni (ELO 2082). Í dag voru tefldar tvær umferðir. Í þeirri fyrri gerði Jón jafntefli við Vijay Bharat frá Indlandi (ELO 1941) en sigraði í þeirri seinni Hans Richard Thjomoe (ELO 1926)frá Noregi. Jón er því með 3 vinninga af 7 mögulegum. Á morgun, í næstsíðustu umferð, teflir Jón við norska skákmanninn Halvor Haga (ELO 2032)

Tap í annari og þriðju umferð

Eftir frábæran árangur í fyrstu umferð Reykjavíkurmótsins tapaði Jón Arnljótsson fyrir bandarískum stórmeistara í annari umferð og fyrir skákmanni frá Singapore í þriðju umferð. Í fjórðu umferð, sem fer fram á morgun teflir Jón við sterkasta skákmann landsins í barnaflokki, Vigni Vatnar Stefánsson, en hann hefur vakið mikla athygli fyrir mikla skákhæfileika, þrátt fyrir ungan aldur.

Jón Arnljótsson teflir á Opna Reykjavíkurmótinu

Reykjavíkurmótið í skák er stærsti skákviðburður hvers árs á Íslandi. Nú tefla um 200 keppendur á mótinu þar á meðal fjölmargir erlendir skákmeistarar. Langt er síðan félagi í Skákfélagi Sauðárkróks keppti í þessu móti og var því sérstaklega ánægjulegt að Jón skyldi ákveða að taka sér frí frá búskapnum og tefla í mótinu.

Þegar þetta er skrifað er fyrstu umferð lokið og má með henni segja að Jón hafi sannað að hann eigi fullt erindi í keppni sem þessa, en í fyrstu umferð gerði hann jafntefli við Lenku Ptacnikovu alþjóðlegan stórmeistara kvenna. Hún státar af 2289 alþjóðlegum ELO stigum. Vonandi heldur Jón áfram á sömu braut en á morgun fær Jón enn erfiðari andstæðing, eða bandaríska stórmeistarann Maurice Ashley sem er með heil 2452 ELO stig. 

Skýrsla liðsstjóra í Íslandsmóti Skákfélaga 2011-2012

Í upphafi marsmánaðar ár hvert er síðari hluti Íslandsmóts skákfélaga tefldur. Að þessu sinni var ferðinni heitið til Selfoss þar sem keppt var í glæsilegum Fjölbrautaskóla þeirra Selfyssinga. Hluti sveitarinnar gisti í sumarhúsi í Ölfusborgum þar sem vel fór um alla en aðrir gistu í heimahúsum á Selfossi og Reykjavík.  

Eftir fyrri hluta Íslandsmóts Skákfélaga var ljóst að það yrði nokkuð þungur róður að halda liðinu í þriðju deild, en sveitin hafði unnið sér sæti í henni á vordögum 2011. Nokkrar breytingar urðu á liðinu og ljóst að við þyrftum a.m.k. að vinna eina viðureign af þremur, sem tefldar voru í seinni hlutanum til að halda sæti okkar. Tveir nýir keppendur voru með okkur að þessu sinni. Þeir Christoffer Munkholm og Birkir Már Magnússon, en aðrir liðsmenn voru Jón Arnljótsson, Unnar Ingvarsson, Þorleifur Ingvarsson, Árni Þór Þorsteinsson og Davíð Örn Þorsteinsson.

Í fyrstu umferð seinni hlutans var teflt við b-sveit Garðabæjar. Hvíldi Unnar eftir ökuferðina frá Sauðárkróki, en Þorleifur var í staðinn á öðru borði. Jón Arnljótsson var á því fyrsta, Christoffer Munkholm á þriðja, Árni Þór Þorsteinsson á fjórða, Davíð Örn Þorsteinsson á fimmta og Birkir Már Magnússon á sjötta. Jón sigraði með ótrúlegum hætti í skák sem skipti nokkrum sinnum um eigendur. Undir lokin var hann kominn með fullkomlega tapaða stöðu, en afar slæmur afleikur andstæðingsins gerði það að verkum að Jón vann fyrir rest. Þorleifur gerði jafntefli á öðru borði og Christoffer sigraði örugglega á þriðja. Þá gerði Árni jafntefli á því fjórða en að þessu sinni töpuðu þeir Davíð Örn og Birkir. Niðurstaðan varð því 3-3 jafntefli og einn punktur kominn í hús. Það var hins vegar ljóst að það myndi ekki duga. 

Í annari umferð skiptu þeir bræður Unnar og Þorleifur um hlutverk, en keppt var við b sveit KR. Þorleifur hvíldi en Unnar kom inn á annað borð.  Jón var eins og ávallt á fyrsta borði og tapaði eftir að hafa haft vænlega stöðu. Sama má segja um Unnar á öðru borði og Christoffer á því þriðja. Betri úrslit hefðu getað fengist úr öllum þessum skákum. Davíð lék illa af sér og tapaði, en þeir Árni Þór og Birkir sigruðu í sínum skákum. Tap 2-4 því staðreynd og var frekar súrt í broti. 

Ljóst var því að ekkert dyggði minna en sigur á móti c sveit Akureyringa. Ákveðið var að hvíla Davíð Örn, sem hafði ekki hitt á sinn besta dag. Jón gerði fljótlega jafntefli á fyrsta borði og Unnar sigraði á öðru eftir afleik andstæðingsins. Þorleifur tapaði á þriðja og því allt í járnum. Á fjórða borði náði Árni Þór að snúa á andstæðing sinn, en eftir sátu Christoffer og Birkir. Báðir voru með vænlegar stöður en ekkert öruggt. Þeim tókst hins vegar báðum að ná fram vinningi og sigur 4 1/2 - 1 1/2 staðreynd. 

Niðurstaðan í mótinu varð því sú að við fengum 6 stig og 18 vinninga sem dugði í 10-12. sæti af 18. liðum í deildinni og héldum við okkur því örugglega uppi. Bestum árangri í mótinu í heild náðu þeir Jón Arnljótsson á fyrsta borði og Árni Þór Þorsteinsson sem tefldi yfirleitt á því fjórða. Þeir fengu báðir 4 1/2 vinning af 7 mögulegum, en þeir Christoffer Munkholm og Birkir Már Magnússon fengu 2 vinninga af 3 í seinni hlutanum, sem var okkur mjög mikilvægt. 

Nánari upplýsingar um einstakar umferðir og árangur liðsmanna má sjá á síðunni: http://chess-results.com/tnr57497.aspx?art=20&lan=1&flag=30&snr=16  . Þar má einnig sjá heildarúrslit mótsins. Skákfélag Sauðárkróks óskar sigurvegurum í öllum deildum til hamingju og þakkar fyrir gott og skemmtilegt mót nú sem endranær. Einnig viljum við sérstaklega þakka vinum okkar í Skákfélagi Selfoss og nágrennis fyrir frábærar móttökur og skemmtilega helgi á Selfossi.

 

Skákfélag Sauðárkróks í 9-12 sæti í þriðju deild

Keppni í Íslandsmóti Skákfélaga lauk nú um helgina með þremur síðustu umferðunum. Markmið Skákfélags Sauðárkróks var að halda sæti sínu í 3. deild, sem tókst eftir harða baráttu. Skýrsla liðsstjóra verður birt hér á síðunni á næstu dögum, en hægt er að nálgast úrslit á síðunni www.skaksamband.is

Christoffer Munkholm nýr félagi í Skákfélagi Sauðárkróks

Skákfélagi Sauðárkróks hefur borist liðsauki, en Christoffer Munkholm hefur gerst félagi í Skákfélagi Sauðárkróks. Christoffer er danskur en búsettur á Íslandi. Hann hefur fengið heimild til að keppa með félaginu í síðari hluta Íslandsmóts skákfélaga, sem fer fram á Selfossi fyrstu helgina í mars.

Jón sigrar með miklu öryggi

Jón Arnljótsson varð öruggur sigurvegari á Atskákmóti Sauðárkróks. Hann lagði alla 8 andstæðinga sína. Í öðru sæti varð Unnar Ingvarsson með 6 1/2 vinning og því þriðja Birkir Magnússon með 4 1/2 vinning. Þrír voru jafnir í næstu sætum, Christoffer Munkholm, Guðmundur Gunnarsson og Tryggvi Þorbergsson, en þeir fengu allir 4 vinninga.

Jón með fullt hús eftir 6 umferðir

Jón Arnljótsson er óstöðvandi á atskákmóti Sauðárkróks og hefur enn fullt hús vinninga eftir 6 umferðir. Birkir Már Magnússon og Unnar Ingvarsson hafa 4 1/2 vinning. Guðmundur Gunnarsson og  Christoffer Munkholm hafa 4 vinninga en Christoffer hefur biðskák að auki. Aðrir eru með minna, en keppendur eru alls 9.