Skákfélag Sauðárkróks í 2. sæti

Um nýliðna helgi fór fram fyrri hluti Íslandsmóts Skákfélaga 2018-19, í Rimaskóla, í Reykjavík og sendi félagið sveit til keppni í 3. deild.  1. umferð var á föstudagskvöldið og þá mættum við b sveit Vinaskákfélagsins og unnum 5-1.  Á laugardaginn voru síðan 2 umferðir og unnum við fyrst c sveit Víkingaklúbbsins 3 1/2- 2 1/2 og seinna sveit Taflfélags Akraness 4-2.  Á sunnudaginn var síðan telfd 4. umferð, en þá töpuðum við fyrir b sveit Taflfélags Garðabæjar með 2 1/2 - 3 1/2 og er sú sveit í efsta sæti með 8 stig og 15 vinninga, en 2 stig fást fyrir sigur í hverri viðureign og gilda stigin hærra en vinningafjöldinn, sem ræður þá röðun þegar stigin eru jöfn.  Skákfélag Sauðárkróks er svo í 2. sæti með 6 stig og 15 vinninga, en Taflfélag Akraness í 3. sæti með 1/2 vinningi minna. Skáksamband Austurlands er einnig með 6 stig og þeir hafa 12 1/2 vinning.  Eftir fyrri hluta Íslandsmóts Skákfélaga 2017-18 var okkar lið með 5 stig og 13 1/2 vinning, í 3.-5. sæti og hafnaði í 3. sæti í mótslok.

Þeir sem telfdu fyrir félagið um helgina voru, talið í borðaröð, Jón Arnljótsson, sem fékk 2 v. af 4 á 1. borði, Birgir Örn Steingrímsson 1 1/2 af 3 á 2. borði, Pálmi Sighvatsson fékk 2 af 4, en hann telfdi 1 skák á 2. borði, en annars á 3. borði.  Unnar Ingvarsson hlaut 3 1/2 á 4. borði (telfdi 1 skák á 3.) og Þór Hjaltalín 3 af 3 mögulegum á 4. (1 skák) og 5. borði.  Árni Þór Þorsteinsson telfdi 2 skákir á 5 b.orði og 1 á 6. og hlaut 2 vinninga og Einar Örn Hreinsson, sem þreytti frumraun sína í þessari keppni, 1 v. af 3 á 6. borði, en þær viðureignir sem hann telfdi í, unnust allar.  Á myndinni hér að neðan, sem Einar tók við upphaf 4. umf. má sjá aðra liðsmenn, talið frá vinstri, Árni, Þór, Unnar, Pálmi, Birgir og Jón.  Aftari myndin er tekin nokkrum mínútum fyrr.